رسالة الى ميدان التحرير

بسم الله الرحمن الرحيم

طبعا محدش مصدق اللى حصل فى مصر وعمر ما كان حد يقدر يصدق ان ده ممكن يحصل
دبابات فى الشارع حظر تجول حرامية بتهجم على البيوت واخيرا تنازل من الرئيس
وسماع لمطالب الشباب اخير الواحد حس ان اللى كان بيعملوه ليه فايدة
اخيرا حاسيين ان صوتنا اتسمع وان الرئيس عرف قد ايه احنا كنا مظلومين فى ظل حكومة نظيف بيه

يمكن الناس اللى هنا معانا فى المنتدى عمرها ما كانت تصدق ان ده هيحصل
يمكن لما كنت بنزل موضوع جرئى اشتم فيه الرئيس او الوزير كان الكل يدخل يتريق
ويكتب شكلك هتدوينا فى داهية وهنبقى نزورك بعيش وحلاوة وكلام من ده
محدش كان عارف ان السكوت مش هيغير
وان علشان نوصل لمطالبنا لازم نتكلم
اللى حصل ده كان سببه شباب جرئ ومحترم ومثقف
قال كل اللى هو عايزه علشان مؤمن بيه
عبر عن رائيه من غير تخريب
وحمى ممتلكاته ومؤسسات مصر العامة
لما الشرطة انسحبت واطلقت البلطجية على الشعب

كان كل اللى يشوفنا واحنا فى الشارع يوم التلات يتريق

ويقول دول هيتلموا وهيطلع عينهم فى امن الدولة
كانت الناس كلها مش مصدقة ان احنا ممكن صوتنا يعلى ويكون اعلى صوت

حتى وزير الداخيلية نفسه قال للرئيس دول 300 واحد واحنا هنربيهم
واحنا مسيطرين على الوضع
مكنش متخيل ان الشباب هيعمل اللى حصل ده

انا نزلت 25/1 وكان معايا 100 واحد وفضلنا نكتير نكتر لحد ما وصلنا ل 15 الف
ويوم الاريعاء والخميس كنا تقريبنا نايمين فى الشارع علشان نطالب بمطالبنا المشروعة

وكانت عبارة عن
1- حل مجلس الشعب والشورى
2- اقالة الحكومة ومحاسبة المفسدين
3- تغير المادة 76و77و88 من الدستور
4-ضمان عدم الترشح لولاية جديدة
5- ضمانات بعدم التوريث
6-حرية تعبير واقامة عدالة اجتماعية

وكان اشد المتقائلين لا يتخيل ان مطالبنا ديه ممكن تتنفذ
كنا بنقول اكتر مطلب ممكن يتحقق هو اقالة الحكومة غير كده مفيش
ديه المطالب اللى انا مؤمن بيها وعلشان كده عبرت عنها
ونزلت التحيري الجمعة علشان اعبر عنها
ووقف قدام الامن المركزى مخافتش اموت وشوفت ناس صحابى مضروبين برصاص مطاطى
وكنا هنموت واحنا بيترمى عليان قنابل مسيلة للدموع وقنابل غاز

شوفت بنات ارجل بكتير من رجالة موجودة هنا بنات مش بتخاف بتقول اللى هى عايزاه من غير خوف
بنات كلها محترمة وولاد ناس كل اللى هى عايزاه تشوف بلدها احسن بلد فى الدنيا

نزلت مع اصحابى نحمى منطقتنا من السرقة بعد ما الداخيلية سرحت المجرمين والحرمية
شوفت ناس بتحب مصر ومش خايفة على حاجة غير على مصر
شوفت مسلم ومسيحى الاتنين مصريين بيحموا بيوت بعض
شوفت شباب بيحمى بنت ميعرفهاش وخايف عليها انها تمشى لواحدها فى الشارع

كل ده شوفته فى مصر

بس دلوقتى قولت اقف وافكر ياترى استمر فى تظاهرى واكمل
وافضل قاعد ولا امشى وكفاية كده
قولت اشوف انا كنت عايز ايه وايه اتحقق
مطالبنا كلنا كانت ال 6 حاجات اللى فوق
لما فكرت قولت خلاص كفاية اللى انا عايزه وناس كتير غيرى عايزاه اتحقق
البلد فيه رئيس وزراء محترم جدا جدا جدا اسمه احمد شفيق
بقى عندنا نائب يعنى مفيش توريث والنائب برده محترم اوووووى اسمه عمر سليمان
الوزراء معظمهم محترمين ومش رجال اعمال
الرئيس ومش هيرشح نفسه تانى
وتعهد بمحاسبة المفسدين اللى تسببوا فى الكارثة

خلاص انا عايز ايه تانى
هنزل ليه من بيتى يوم الجمعة
علشان اقول لواحد اطلع بره بلدك
محدش يقدر يجبر حد انه يطلع ويسيب بلده

وعلشان كده عايز اوجه رســـــــــــــالــــة لكل الناس اللى هتنزل الجمعة الجاية

اقعد وفكر مع نفسك انت كنت عايز ايه
وايه اتحقق وايه لسه
كفاية لحد كده خلينا نصبر شوية ونشوف ايه اللى هيحصل
خلينا نشوف كلامه صدق ولا كدب والحكومة الجديدة هتعمل ايه
لو عملت حاجات كويسة خير وبركة
ولو معملتش ميدان التحرير طريقه معروف
خلاص كفاية لحد كده
احنا وصلنا لاكتر مما كنا نتمناه
بس برده لازم نفكر هو اللى احنا عايزينه ده مشروع ولا لا
احنا اول ما طلنا المظاهرات عمر ما حد كان بيقول رحيل مبارك كلنا كان لينا طالبات مفيش فيها رحيل مبارك
علشان كده تعالو نصبر شوية ونشوف ايه اللى هيحصل
احنا فضلنا صابرين 30 سنة وساكتين
تعالو نصبر 7 شهور ونشوف ايه اللى هيحصل

بجد كفاية وياريت اى حد طالع يوم الجمعة يقعد فى بيته وستنى ال 7 شهور الجاين ونشوف ايه اللى هيحصل بعد كده

[ندعوك للتسجيل في المنتدى أو التعريف بنفسك لمعاينة هذه الصورة]

» ميدان التحرير وفقه المسجد الحرام
» حصريا بكاء تامر حسنى بعد الاعتداء عليه بالضرب فى ميدان التحرير
» رسالة قلب مجروح
» رسالة لكل مسلم
» رسالة من صعيدي مش بيعرف يكتب الى زوجته